- 729 -

1448. April 26.

Vnsern fruntlichen grus zuuor, erbern, weysen lieben frunde vnd gute gonnere, wir haben vornomen, wie das Mathis Gruczenschreiber ewir mitburger den vnsern ir gut vnd habe zu euch zu Legnicz mit gerichtis hulffe gehemmet vnd vorkummert hat von solchis geldis wegen, das her vor den bund beczalit vnd vsgegeben hot, als euch denne wol wissentlich ist, so czweyfiln wir auch nicht euch wol wissentlichen vnd yndechtig, das wir vnser anczal des geldis zu rechter czeit gancz vnd gar beczalet vnd geben haben vnd der broch an vns nye gewest ist, sundir an den Lembergern vnd Bunczlern, die ire anczal des geldis nicht gegeben noch vfgerichtt haben, des die vnsern vmbillichen entgelden als vns duncket, bitten wir euch fruntlichen ir wellit reden vnd bestellen mit dem gen. Mathis, dem ewirn, das her den vnsern ir gut vnd habe frey vnd vmbehabt volgen losse, wenne so wir vff die nehiste quatuortempor vff dem bunde zum Jawor bye inandir sein werden, wellen wir mittenandir die sachen vorhandiln vnd solche weise vnd wege vornemen, an weme der gebrechen ist, das das gewandilt vnd gehalden werde wes do geredt vnd gemacht ist wurden, dobey wir vnsern fleys tun wellen noch vnserm besten vermogen, des wellin wir euch gerne dancken vnd bitten des wider ewir vorschriben antwort, geben am frey tage vor dem sontage vocem iucunditatis anno & XLVIII.
Ratmanne der stat Breslow.

Mit Rückaufschrift an den liegnitzer Rath.

Orig. Kgl Bibl z. Berl Ms. Boruss. f. 568. No. 30.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866